پروژێ‌ ڤه‌گوستنا هێلا كاره‌بێ‌ یا 132كه‌ی ڤی ژخه‌بات بو ئاكرێ‌ ل پارێزگه‌ها دهوكێ‌ هاته‌ ڤه‌كرن

ئه‌ڤرو سپێدێ‌ 23/ 12/2019 ل سنورێ‌ قه‌زا ئاكرێ‌ ل ژێر چاڤدێریا به‌رێز مه‌سرور بارزانی سه‌روكێ‌ حكومه‌تا هه‌رێما كوردستانێ‌ وب ئاماده‌بونا به‌رێزان كه‌مال محمد صالح وه‌زیرێ‌ كاره‌با حكومه‌تا هه‌رێما كوردستانێ‌ وفه‌رهاد ئه‌مین ئه‌تروشی پارێزگه‌رێ‌ دهوكێ‌ وبه‌رپرسێ‌ لقێ‌ 9 وچه‌ند به‌رپرسێن ئیداری پروژێ‌ ڤه‌گوستنا هێلا كاره‌بێ‌ یا 132كه‌ی ڤی ژخه‌بات ل سنورێ‌ پارێزگه‌ها هه‌ولێرێ‌ بو ئاكرێ‌ ل سنورێ‌ پارێزگه‌ها دهوك هاته‌ ڤه‌كرن .
درێ‌ ورسمێن ڤه‌كرنا پروژه‌ی دا په‌یڤ هاتنه‌ خاندن ولبه‌راهیێ‌ ئاری زرار رێڤبه‌رێ‌ كومپانیا هێرو یا پروژه‌ ئه‌نجامدای چه‌ند رونكرن دانه‌ سه‌ر پروژه‌ی وئه‌و كارێ‌ ل سه‌ر هاتیه‌ كرن كو دده‌مێ‌ پیڤای دا هاتیه‌ بجهئینان وسوپاسیا هه‌موو لایه‌نان كر كو بوینه‌ هاریكار كو پروژه‌ گه‌هاندیه‌ قوناغا دوماهیێ‌ وكه‌تیه‌ دخزمه‌تێ‌ دا .
پاش وه‌زیرێ‌ كاره‌با حكومه‌تا كوردستانێ‌ دیاركر كو پروژێ‌ ڤه‌گوستنا هێلا كاره‌بێ‌ یا 132كه‌ی ڤی ژخه‌بات بو زه‌نگه‌نه‌ وئاكرێ‌ ودهوك زور یێ‌ گرنگه‌ وپشتی پروژه‌ ب دوماهی هاتی وكه‌تیه‌ دخزمه‌تێ‌ دا ره‌وشا كاره‌با پارێزگه‌ها دهوكێ‌ باشتر لێ‌ هاتیه‌ وسێ‌ ده‌م ژمێران كاره‌با گشتی زێده‌بویه‌ .
هه‌روه‌سا گوت: دپلانا وه‌زاره‌تا كاره‌بێ‌ دا یه‌ چه‌ند پروژێن نوو ل سنورێ‌ پارێزگه‌ها دهوكێ‌ ول جهێن جودا جودا ل هه‌رێما كوردستانێ‌ ئه‌نجامده‌ین وره‌وشا كاره‌بێ‌ بهێته‌ باشكرن ونوكه‌ پتر ژ(500) میگاواتێن دی یێن كاره‌بێ‌ كه‌تینه‌ سه‌ر تورێن كاره‌بێ‌ نیشتمانی ل هه‌موو كوردستانێ‌ وسوپاسیا هه‌موو لایه‌نان كر یێن بوینه‌ هاریكار كو پروژه‌ دده‌مه‌كێ‌ ده‌ست نیشان كریدا ب دوماهی هاتیه‌ .
پارێزگه‌رێ‌ دهوكێ‌ دپه‌یڤه‌كێدا پیروزباهیا خه‌لكێ‌ پارێزگه‌ها دهوكێ‌ كر هه‌مبه‌ر بجهئینانا ڤی پروژێ‌ گرنگ وسوپاسیا هه‌ردوو سه‌روكێن حكومه‌تا كوردستانێ‌ یێن كابینا (8و9) و وه‌زاره‌تا كاره‌بێ‌ كر بو دورستكرنا ڤی پروژه‌ی هه‌روه‌سا سوپاسیا كومپانیا جێ‌ به‌جێكار وهه‌موولایه‌نان كر كو بوینه‌ هاریكار كو پروژه‌ ل ده‌مێ‌ ده‌ست نیشانكری هاتیه‌ ئه‌نجامدان .
هه‌روه‌سا گوت : كاره‌با گشتی سامانه‌كێ‌ نیشتمانی یه‌ و مولكێ‌ هه‌موو خه‌لكێ‌ كوردستانێ‌ یه‌ ودڤێت زێده‌گاڤی ل سه‌ر نه‌هێنه‌ و بره‌نگه‌كێ‌ دادپه‌روه‌رانه‌ بگه‌هیته‌ هه‌ر تاكه‌كێ‌ كوردستانێ‌ وخواست كو هاولاتی ژی دهاریكاربن دگه‌ل تیمێن دانانا پیڤه‌رێن زێره‌ك بو وێ‌ یه‌كێ‌ ده‌م ژمێرێن كاره‌با نیشتمانی بهێنه‌ زێده‌كرن وكاره‌با موه‌لیدا بهێته‌ كێمكرن و ژینگه‌ه پتر بهێته‌ راگرتن.
پاش پروژه‌ ب ره‌نگه‌كێ‌ فه‌رمی هاته‌ ڤه‌كرن.
هه‌ژی گوتنێ‌ یه‌ پروژه‌ ل سه‌ر بودجا حكومه‌تا هه‌رێما كوردستانێ‌ بكوژمێ‌ (7) ملیون و(425) هزار دولاران هاتیه‌ ئه‌نجامدان درێژیا پروژه‌ی پتره‌ ژ 32كم 104بورج هاتینه‌ دانان ، پروژه‌ دماوێ‌ (120) روژا دا هاته‌ ئه‌نجامدان وشیان هه‌نه‌ (400)میگاواتێن كاره‌بێ‌ ڤه‌گوهێزیت وروژانه‌( 350)كاركه‌ر وته‌كنیكارێن كومپانیا هێرو ل سه‌ر پروژه‌ی كاركریه‌.