ئه‌ڤرو سپێدێ 18/ 8/2019 ل كوچكا پارێزگه‌ها دهوكێ دكونگره‌كێ روژنامه‌ڤانیدا به‌رێز به‌هزاد على ئاده‌م پارێزگه‌رێ دهوكێ ب وه‌كاله‌ت ب ئاماده‌بونا رێڤه‌به‌رێن ئاڤا دهوكێ ورێڤه‌به‌رێ ئاڤا ده‌وروبه‌ران وهاریكارێ رێڤه‌به‌رێ گشتى یێ ساخله‌میێ ورێڤه‌به‌رێ پروژێ ئاڤا خراب دێمێ مزگینیا دورستبونا پروژێ ئاڤا باژێرێن دهوك وسێمێلێ وده‌روبه‌ران راگه‌هاند.
پارێزگه‌رێ دهوكێ ب وه‌كاله‌ت دیاركر كو پشتى هه‌ول وبزاڤێن به‌رده‌وام یێن تیمێن كارى ل سه‌ر پروژێ ئاڤێ ل خراب دێمى شڤێدى پروژه وه‌كو جاران كه‌ته كارى و وه‌كو جاران ئاڤ بو تاخێن باژێرێن دهوك وسێمێل وده‌وربه‌ران هاته پالدان وب قه‌بارێ خو یێ دورست كو ئه‌وژى (8000)م سێ جاركینه دده‌مژمێره‌كێ دا وبڤێ هه‌لكه‌فتێ سوپاسیا خه‌لكێ دهوك وسێمێلێ وده‌روبه‌ران كر كو شیاینه ل روژێن بورى خوراگرن ژبه‌ر كێمبونا ئاڤێ .
هه‌روه‌سا ده‌ست خوشى ل تیمێن كارى كر وسوپاسیا ده‌زگه‌هێن راگه‌هاندنێ ژى كر كو ب ره‌نگه‌كێ پیشه‌یى ئاریشا ئاڤێ به‌رچاڤ دكر وته‌كه‌زكر كو هه‌موو پێرابونێن ته‌كنیكى هاتینه وه‌رگرتن كو جاره‌كا دن پروژه ژكارنه‌كڤیت.
پاش هاریكارێ رێڤه‌به‌رێ گشتى یێ ساخله‌میا دهوكێ دیاركر كو ل دوڤ ئه‌و پێداچونێن ده‌زگه‌هێن ساخله‌میێ كرین ل سه‌ر ئاریشا ئاڤێ ژرویێ ته‌ندورستیڤه هیچ ئاریشێن زیانبه‌خش ل چ جهه‌كى بو وه‌لاتیان په‌یدانه‌بوینه وچ حاله‌ت نه‌هاتینه توماركرن.
پاش ئه‌ندازیار جه‌لال جمیل رێڤه‌به‌رێ ئاڤا دهوكێ گوت: ئه‌م داخازا لێبورینێ ژوه‌لاتییان دكه‌ین كو ل روژێن بورى ئاریشا كێم ئاڤیێ په‌یداببو ژبه‌ر هوكاره‌كێ سروشتى یێ دور ژده‌ستێ مه ئه‌وژى په‌یدابونا رێژه‌كا مه‌زن یا كه‌ڤزێ بو ل سه‌ر ژێده‌رێ سه‌ره‌كى یێ ئاڤێ ل روبارێ دجله وئه‌ڤه چه‌ند روژ بوون كارگێریا پارێزگه‌هێ وتیمێن مه پێڤه دموژیلبون ودوهى ب شه‌ڤ ئه‌ڤ ئاریشه هاته چاره‌سه‌ركرن ومه شیا وه‌كو جاران پروژه‌ى بێخینه كارى وب قه‌بارێ (8000) مترێن سێ جاركى دده‌م ژمێره‌كێ دا ئاڤێ بو دهوك وسێمێل وده‌روبه‌ران پالده‌ت.
رێڤه‌به‌رێ ئاڤا دهوكێ ته‌كه‌زكر كو دروژێن په‌یدابونا ئاریشێ دا ئه‌و شیاینه 75% ئاڤێ بده‌نه تاخێن دهوك وسێمێلێ وده‌روبه‌ران ونوكه پروژه ب قه‌بارێ خویێ ئاسایى كاردكه‌ت وئاریشه هاته چاره‌سه‌ركرن.
پاش رێڤه‌به‌رێ پروژێ ئاڤێ ل خراب دێمى گوت: نوكه ئاریشا كه‌ڤزێ وپاقژكرنا ئاڤێ ل سه‌ر پروژه‌ى هاتیه چاره‌سه‌ركرن وجوره‌كێ (شه‌بێ) هاتیه ب كارئینان بو تافیلكرنا ئاڤێ كاریگه‌ریا وێ (7) جارا ژشه‌با به‌رى نوكه دهاته ب كارئینان ب هێزتره ونوكه ئاڤه‌كا پاقژ ول دوڤ ستانده‌رێن ته‌ندورستى بو هاولاتییان دهێته پالدان.
پاش پسیار ژلایێ روژنامه‌ڤانان هاتنه ئاراسته‌كرن وبه‌رسڤ ل سه‌ر هاتنه دان.
h
