چه‌ند بریارێن نوو یێن ژورا عه‌مه‌لیاتا یا به‌رهه‌نگاریا ڤایروسێ كورونا هاتنه ده‌ركرن
ئه‌ڤروئێڤارى 17-3-2020 به‌رێز فه‌رهاد ئه‌مین ئه‌تروشى پارێزگه‌رێ دهوكێ دكونگره‌كێ روژنامه‌ڤانیدا دیاركر كو ئه‌ڤرو كومبونا ئاسایى یا ژورا عه‌مه‌لیاتا ل پارێزگه‌ها دهوكێ هاته ئه‌نجامدان وچه‌ند بریارێن نوو هاتنه ده‌ركرن.
پارێزگه‌رێ دهوكێ سوپاسى وده‌ست خوشى ل خه‌لكێ پارێزگه‌هێ كر كو هه‌تا نوكه زور دهاریكاربوینه دگه‌ل ژورا عه‌مه‌لیاتا بوبجه ئینانا هه‌موو بریار ورێنمایێن به‌رى نوكه هاتینه ده‌ركرن وگوت هه‌تا نوكه چ حاله‌تێن ڤایروسێ كورونا ل پارێزگه‌ها دهوكێ په‌یدانه‌بوینه وخواست كو خه‌لكێ پارێزگه‌هێ پتر د هشیار و هاریكاربن دگه‌ل لایه‌نێن په‌یوه‌ندیدار ژبو بجه ئینانا هه‌موو رێنما وبریارێن حكومه‌تا كوردستانێ وژورا عه‌مه‌لیاتا بو وێ یه‌كێ ئه‌ڤ نه‌خوشیه ژ هه‌موو خه‌لكێ پارێزگه‌هێ بهێته دوركرن.
هه‌روه‌سا گوت: هه‌موو بازارێن پارێزگه‌ها دهوكێ ل سه‌عه‌ت 12شه‌ڤا 18-3-2020دێ هێنه گرتن ئانكو ل سپێده‌یا روژا 19-3-2020ئه‌ڤ بریاره دێ كه‌ڤیته دوارێ بجه ئینانێ دا هه‌تا روژا 24-3-2020 دێ كار ب بریارێ هێته كرن ژبلى ئه‌ڤجهێن ل خارێ دیاركرى دێ ڤه‌كرى مینن ئه‌وژى ئه‌ڤه‌نه (جهێن ئه‌رزاقى دفروشن – گوشت فروش – فرنێن نانى – سه‌مونخانه – ده‌رمانخانه – جهێن پێدڤیێن ساخله‌میێ (صحیات).
وئه‌و بریارێن به‌رى نوكه هاتینه ده‌ركرن ب گرتنا بازار وجهێن گشتى هه‌ر دبه‌رده‌وامیێ دایه وخارنگه‌ه وته‌زیاتى وشیریناهى بتنێ دێ سه‌فه‌رى فروشن هه‌روه‌سا جهێن پیشه‌سازى وه‌كو په‌نجه‌رچى وگێچ وبه‌لانس و فیته‌ر وروون گوهور) دێ دڤه‌كریبن.
هه‌روه‌سا گوت: دڤێت ئانگجیێن كه‌مپا پێگریێ ب هه‌موو رێنما وبریارێن ژورا عه‌مه‌لیاتا بكه‌ن وهاتن وچونێ بو ژده‌رڤه‌ى كه‌مپا نه‌كه‌ن وهه‌موو لناڤ كه‌مپێن خو بمینن چونكو ئارمانج ئه‌وه سلامه‌تیا هه‌موو كه‌سان وه‌لاتیان بهێته پاراستن .
پارێزگه‌رێ دهوكێ ئه‌ویه‌ك ژى به‌رچاڤكر كو ل روژێن بهێت لیژنێن تایبه‌ت دێ ب بلنگویا لناڤا بازارى بانگ كه‌ن كو هاولاتى هاتن وچونێ وسه‌ردانا كێمكه‌ن ودمالێن خودا بمینن دا ژڤێ په‌تایێ بهێنه پاراستن.
