ب چاڤدێریا پارێزگه‌رێ دهوكێ ورك شوپه‌ك بو پلاندانانا خو گونجاندنێ دگه‌ل قه‌یرانال 3/6/2016 ل ئوتێلا ریكسوس ب ئاماده‌بون و چاڤدێریا به‌رێز فه‌رهاد ئه‌مین ئه‌تروشی پارێزگه‌رێ دهوكێ و فه‌هیم عه‌بدولا سه‌روكێ جڤاتا پارێزگه‌ها دهوكێ , بوردێ كاروبارێن مروڤایه‌تی ل پارێزگه‌ها دهوكێ ب هه‌فكاریا رێكخراوا UNDP ورك شوپه‌كا تایبه‌ت بو پلاندانانا خو گونجاندنێ دگه‌ل قه‌یرانا بو هژماره‌كا زور یا رێڤه‌به‌رێن ده‌زگایێن حكومه‌تا هه‌رێمێ و رێكخراوێن سه‌ر نه‌ته‌وه‌یێن ئیكگرتی ڤه ساز كر ,
تێدا به‌راهیێ په‌یڤا بخێرهاتنێ ژلایێ به‌رێز ئیسماعیل محه‌مه‌د ئه‌حمد هاریكارێ پارێزگارێ دهوكێ هاته پێشكێشكرن وسوپاسیا رێكخراوا UNDP كر بو پشته‌ڤانی كرن و هه‌فكاری كرنێ ل ورك شوپێ و هیڤی خواست كو كارێ ورك شوپێ سه‌ركه‌فتیانه برێڤه بچیت و مفا ژی بهێته وه‌رگرتن ,
دیڤدا به‌رێز فه‌رهاد ئه‌مین پارێزگه‌رێ دهوكێ دپه‌یڤه‌كێ سه‌رباری ده‌ست خوشی كرنی ل رێكخه‌رێن ورك شوپێ به‌حسێ گرنگیا دانانا پلانا و ب تایبه‌تی ده‌مێن قه‌یرانا و ته‌نگاڤیا بیخه‌مه‌ت سه‌ركه‌فتێ دكاریدا و خزمه‌تكرنه‌كا باشتر و ب شیانێن كێمتر كر و ئاماژه كره وێ بارگرانیا مه‌زن یا كه‌تیه سه‌ر پارێزگه‌ها دهوكێ ب هاتنا وێ رێژا مه‌زن یا ئاواره و په‌نابه‌را و داكوكی ل سه‌ر پێتر پشته‌ڤانی كرنا جڤاكێ نێڤ ده‌وله‌تی كر بو هندێ خه‌لكێ ئاواره بشێن ڤه‌گه‌رینه سه‌ر جه و وارێن خو ب تایبه‌ت ده‌ڤه‌رێن كو هاتینه رزگار كرن ژ ده‌ستێ داعش و گه‌هاندنا خزمه‌تا بو خه‌لكێ وان ,
دیڤدا رێڤه‌به‌ریێن ده‌زگایێن حكومه‌تا هه‌رێمێ هه‌ر ئێكی به‌حسی وان خزمه‌تاو پێدڤیا كر یێن رێڤه‌به‌ریێن وان پێدڤی داكو بشێن باشتر خزمه‌تێ بكه‌ن و ل دیماهیا ورك شوپێ گه‌نگه‌شه‌كا به‌رفره‌ه ل سه‌ر خال و برگێن وێ هاته كرن
دداخویانیه‌كێ به‌رێز ئیسماعیل محه‌مه‌د ئه‌حمه‌د هاریكارێ پارێزگه‌رێ دهوكێ بو كاروبارێن مروڤایه‌تی دیار كر كو ئارمانجا ئه‌نجام دانا ڤێ ورك شوپێ ئه‌وه بوردێ كاروبارێن مروڤایه‌تی ل پارێزگه‌هێ پلانه‌ك هه‌بیت و خوئاماده بكه‌ین چونكی مه هژماره‌كا زور یا ئاوارا و په‌نابه‌را یا هه‌ی ل پارێزگه‌هێ و پێدڤیه پلانا هاریكاری كرنا ڤان ئاوارا به‌رهه‌ڤ كه‌ین نه‌خاسمه هه‌رێما كوردستانێ دقه‌یرانا ئابوری دا دژیت و ئه‌م پێدڤیێن به‌رچاڤ بكه‌ین بو رێكخراوێن UN و ده‌وله‌تێن هاریكار داكو هاریكاریا مه بكه‌ن ل قوناغێن بهێت دا ب تایبه‌تی پروژێن خزمه‌تگوزاری ژبه‌ر كو گڤاشتنه‌كا مه‌زن یا كه‌تیه سه‌ر ملێن فه‌رمانگه‌هێن حكومه‌تا هه‌رێمێ ل پارێزگه‌هێ ,
و گوت : مه ل پارێزگه‌ها دهوكێ 20 رێڤه‌به‌ریێن خزمه‌تكاری یێن سه‌ره‌كی ژێگرتن داكو هه‌ر ئێك پلان و به‌رنامێن خو بدانن و پێدڤیێن خو یێن گرنگ به‌رچاڤ كه‌ن ئه‌مژی وه‌كو پارێزگه‌ه دێ هه‌می بزاڤا كه‌وین كو ب هه‌فكاریا لایه‌نێن هاریكار و UN پشكه‌كێ ژ ڤان پێدڤیا بجه بینین و چاره بكه‌ین داكو بشێن به‌رده‌وامیێ ب ده‌ینه خزمه‌تگوزاریێن فه‌رمانگه‌هێن حكومه‌تا هه‌رێمێ ل پارێزگه‌هێ و بشێن پێتر خزمه‌تا ئاواره و په‌نابه‌را و خه‌لكێ پارێزگه‌هێ ژی بكه‌ین ,,
