ب هه‌لكه‌فتا رۆژا جیهانى یا په‌نابه‌ران ئه‌ڤرۆ سپێدێ رۆژا دوو شه‌مبى 20/ 6/2022 ل هولا كونفرانسان ب ئاماده‌بونا به‌رێزان ماجد سه‌ید صالح نونه‌رێ پارێزگارێ دهۆكێ وچه‌ند به‌رپرسێن رێكخراوێن مروڤایه‌تى وكه‌سایه‌تیێن ده‌ڤه‌رێ وخێرخازى وهژماره‌كا په‌نابه‌ران رێ ورسمه‌كێ تایبه‌ت ژلایێ رێكخراوا (UNHCR) ول ژێر دوریشمێ ” هه‌ر كه‌سه‌كى مافێ ئارامیێ هه‌یه” هاته ئه‌نجامدان.
لبه‌راهیێ پێشانگه‌هه‌كا كارێن ده‌ستى وفلكلورى كو ژلایێ په‌نابه‌رێن كه‌مپێن پارێزگه‌هێ هاتبو ئاماده‌كرن هاته ڤه‌كرن.
پاش رێ ورسمێن چالاكیان هاتنه گێران وچه‌ند په‌یڤ هاتنه خاندن ژوانا په‌یڤا رێكخراوا (UNHCR) ل دهۆكێ تێدا سوپاسیا خه‌لكێ پارێزگه‌هێ وحكومه‌تا هه‌رێمێ كر بو حه‌واندنا وێ ژمارا زور یا ئاواره وپه‌نابه‌ران ل پارێزگه‌هێ وهه‌ماهه‌نگیا وان دگه‌ل رێكخراوێن مروڤایه‌تى و(UNHCR) كو باشتر هاریكاریا په‌نابه‌ران دكه‌ن.
پاش نوینه‌رێ پارێزگارێ دهۆكێ دپه‌یڤه‌كێدا بناڤێ د.عه‌لى ته‌ته‌ر پارێزگارێ دهۆكێ ده‌ستخوشى ل رێكخراوا(UNHCR) و ئه‌وان سازیا كر یێن ئه‌ڤ چالاكیه رێكخستى وگوت: كه‌سێ هندى كوردا ئاواره‌یى په‌نابه‌رى نه‌دیتى یه وته‌كه‌زكر كو ئاواره وپه‌نابه‌رێن ئیرو ل پارێزگه‌هێ دژین خوشك برایێن مه‌نه وهندى مابنه ل ده‌ڤه‌رێ دێ هاریكاریا وان كه‌ین وخواست كو كاودان خوشببن وهه‌موو ئاواره وپه‌نابه‌ر ڤه‌گه‌رنه سه‌ر جه وارێن خو .
پاش په‌یڤا ئاواره‌یان هاته خاندن هه‌روه‌سا چه‌ند فلمێن دیكیومه‌نتارى وچالاكیێن هونه‌رى هاتنه ئه‌نجامدان.
هه‌ژى گوتنێ یه پتر ژ 327هزار ئاواره‌یان وپتر ژ80هزار په‌نابه‌ران ل ناڤ وده‌رڤه‌ى كه‌مپا ل سنورێ پارێزگه‌ها دهۆكێ دژین وحكومه‌تا هه‌رێمێ ب هه‌ڤكارى دگه‌ل سازیێن UNومروڤایه‌تى هاریكاریا وان دكه‌ن.
