ئەڤرۆ نیڤرۆ رۆژا دووشەمبى 3/تەموزێ /2023 ێ بەرێز ماجد سەید سالح پارێزگارێ دهۆکێ ب وەکالەت پێشوازیا بەرێزان “سەید خەلیلى” سەروکێ ژورا هەڤکاریێ ل ئورمیێ و “ئیسماعیل ئیسماعیلى” ئەندامێ جڤاتا کارگێرى یا ژورا هەڤکاریێ و”حسێن یاد ” ئەندامێ جڤاتا ناڤبرى و “محمد رزا شوجاعى” سکرتێرێ ژورا هەڤکاریێ کر.
دهەڤدیتنەکێدا ب ئامادەبونا سەروکێ ژورا بازرگانى ل دهۆکێ ورێڤەبەرێن وەبەرهێنانێ وپیشەسازى ل دهۆکێ بەحسێ پەیوەندیێن بازرگانى وئابورى وکلتورى دناڤبەرا هەرێما کوردستانێ ودەولەتا ئیرانێ ب تایبەتى دناڤبەرا پارێزگەها دهۆکێ وپارێزگەها ئەزربێجانا رۆژئاڤا (ئورمیێ) هاتە کرن.
سەروکێ شاندى دیارکر کو سەرمایەدار وبەرهێنەر وکومپانیێن ئیرانى ل ئورمیێ پێ خوشە پەیوەندیێن خو یێن ئابورى وبارزگانى و وەبەرهێنانێ دگەل پارێزگەها دهۆکێ پتر پێشبێخن وئەوان لبەرە ل مەها (ئەیلولێ ) یا ئەڤ ساڵە پێنجەمین پێشانگەها خو یا بازرگانى وپیشەسازى ل دهۆکێ ڤەکەن وخواست کو پارێزگەها دهۆکێ هاریکار وپشتەڤانیا ڤێ پێنگاڤێ بکەت.
پارێزگارێ دهۆکێ ب وەکالەت بناڤێ د.عەلى تەتەر پارێزگارێ دهۆکێ وکارگێریا پارێزگەهێ خوشحالیا خو ب سەرەدانێ دیارکر وبەرهەڤیا پارێزگەهێ وهەموو رێڤەبەریێن پەیوەندیدار نیشان دا بو خورتکرنا هەموو جورێن پەیوەندیا دگەل کومارا ئیسلامى یا ئیرانێ نەخاسمە ڤەکرنا پێنجەمین پێشانگەها بازرگانى وپیشەسازى ل دهۆکێ.
